TWEMMIN

Nemmen :

• li l-edukazzjoni hija ċ-ċavetta tal-futur ta’ pajjiżna;
• f’edukazzjoni li kapaċi ssib post u żvog għal kull tifel u tifla irrispettivament mill-kapaċitajiet tagħhom;
• f’edukazzjoni li tgħinna jkollna ħaddiema mħarrġa u b’hekk insaħħu l-kompetittivita’ ta’ pajjiżna;
• li għandna noffru aktar opportunitajiet ta’ edukazzjoni għolja (masters u dottorati) f’pajjizna stess mingħajr ma neskludu l-aċċess għal dawn barra minn xtutna;    
• f’sistema edukattiva li tinvolvi lill-ġenituri u lill-familja sabiex l-iskola tkun estensjoni tad-dar u d-dar estensjoni ta’ l-iskola;

Fuq kollox nemmen f’sistema edukattiva li xxettel kultura soda favur l-ambjent u l-wirt nazzjonali ta’ pajjiżna.

---

Nemmen:

• f’servizzi tas-saħħa ta’ l-ogħla kwalita’ għall-poplu kollu;
• li l-istat għandu jiżgura li l-poplu kollu jkollu aċċess għal dawn is-servizzi mediċi ta’ kwalita’ għaliex pajjiż b’saħħtu jiddependi minn poplu b’saħħtu.   
• li pajjizna jrid jivvalorizza aktar lit-tobba u l-istaff mediku li jaħdmu ma’ l-istat sabiex dawn ma jkollhomx il-ħtieġa li jiddedikaw ħinhom biex jagħmlu xogħol lil hinn mill-istituzzjonijiet mediċi ta’ l-istat.
• li l-istat għandu jinvesti aktar riżorsi fil-prevenzjoni;
• li għandna nisfruttaw l-eċċellenza li lħaqna fil-livell mediku ħalli pajjiżna jattira aktar pazjenti barranin (ta’ min jgħid li dawn iħallsu!!);

---

Nemmen :

• li l-ambjent għandu jkun fil-qofol ta’ kull deċizjoni li nieħdu għax kwalita’ ta’ ħajja aħjar tiddependi minn ambjent nadif u tajjeb. 
• li l-Gvern għandu jiżgura ambjent sostenibbli u li kull deċizjoni tqis l-impatt fuq l-ambjent u fuq il-ġenerazzjonijiet futuri. 
• li jkollma deadlines definiti għal titjib f’diversi oqsma bħal tnaqqis tat-tniġġiz tal-arja u aktar użu tat-trasport pubbliku;
• li rridu nkomplu nħadru pajjiżna bit-tħwwil ta’ aktar siġar;
• li l-Gvern jagħti inċentivi lill-kumpaniji privati li jaddottaw prattiċi tax-xogħol li jnaqqsu l-ħela tar-riżorsi u li jgħinu finanzjarjament inizjattivi ambjentali;
• li l-Gvern jinċentiva b’mod qawwi l-użu ta’ renewable energies u  li jservi ta’ katalista f’dan il-qasam;
• il-Gvern għandu jagħti l-eżempju billi jkompli jaddotta politika ta’ green public procurement ħalli jinċentiva prodotti li jirrespettaw l-ambjent;
• li l-programm ta’ edukazzjoni ambjentali Eko-Skola għandu jibqa’ jingħata l-appoġġ neċessarju;

Nemmen fuq kollox li investiment fil-qasam ta’ l-ambjent eventwalment inaqqas l-ispiza li jkollna nġorru fis-sistema tas-saħħa.

---

Nemmen:

• fil-ħiliet tal-artisti Maltin u Għawdxin. 
• li l-kultura għandha tingħata l-importanza li jixirqilha anke fil-kurrikulu ta’ l-iskejjel tagħna. 
• li l-istat għandu jappoġġja dawn it-talenti u jipprovdi opportunitajiet fejn dawn it-talenti jikbru f’Malta u barra minn xtutna; 
• li għandu jkollna istituti edukattivi għolja li jispeċjalizzaw fid-danza u arti applikata;
• li rridu nxettlu l-kreattivita’ ta’ kull persuna billi nesponu perspettiva kulturali wiesa u libera.

Fuq kollox nemmen li għandna kultura Ewropea b’pinzellati tal-kultura Għarbija, li tagħmilna poplu uniku b’identita’ proprja.

---

Nemmen:

• li l-Ewropa hi darna;
• li l-Ewropa hija nisġa ta’ popli u mhux ta’ stati;
• li l-istituzzjonijiet Ewropej jeħtieġ isaħħu l-kuntatt maċ-ċittadini ħalli dawn jifhmu dejjem aktar il-valuri li fuqhom hija mibnija din l-Ewropa;
• li rridu nkomplu nisfruttaw is-sħubija tagħna biex inġibu l-livell tal-għixien tagħna daqs tal-aktar pajjiżi sinjuri fl-Ewropa; 
• f’Ewropa miftuħa għall-kumplament tad-dinja u mhux f’Ewropa fortizza;
• li l-Ewropa għandha jkollha politika barranija komuni, li taħdem b’mod attiv għall-kisba tal-paċi u l-firxa tal-ġid fid-dinja. 

---

Nemmen

• f’soċjeta’ fejn ħadd ma jibqa’ lura. 
• f’politika soċjali li tgħin fit-tkabbir tal-familja u l-ulied għax pajjiż li ma jkollux ulied huwa pajjiż li ma jistax jikber;
• li soċjeta’ ‘zagħzugħa’ biss tiggarantixxi l-pensjonijiet lill-anzjani u l-għajnuna lil dawk l-aktar fil-bżonn; 
• irridu nirbħu l-ostakli kollha li jfixklu t-tisħiħ tal-familja u għalhekk irridu niprovdu housing u servizzi soċjali adegwati u impjiegi li jagħtu dinjita’;
• irridu niffaċilitaw l-irwol tal-mara omm mad-dinja tax-xogħol;
• li għandu jingħata taħriġ ta’ stress control ħalli nkunu kapaċi naffrontaw mumenti diffiċli mingħajr ma naqgħu fil-vizzji li jkissruna;
• li l-mira tagħna tibqa’ dik li l-anzjani jibqgħu attivi u li noffru għajnuna personalizzata lil dawk li jisfgħu dipendenti;
• li lill-persuni bi bżonnijiet speċjali rridu nintegrawhom aktar fis-socjeta’ b’aċċessiblita’ fiżika u b’aċċesibilita’ għax-xogħol u l-edukazzjoni.

Fuq kollox nemmen li rridu nindirizzaw realtajiet ġodda bħal familji b’ġenitur wieħed u l-omosesswali. 

---

Nemmen

• fil-liberta’ tal-ħsieb u fil-liberta’ ta’ l-espressjoni.  
• li l-liberta’ ma tfissirx ir-rebħa tal-individwu fuq il-komunita', iżda li l-individwu jikber b'mod sħiħ filwaqt li jirrispetta lil dawk ta' madwaru;  

• li l-liberta' hija wkoll sigurta’ - il-liberta' li tagħmel mixja bil-kwiet mingħajr ma tħossok mhedded, il-liberta' li tmexxi azjenda mingħajr l-indħil żejjed tal-istat; 
• li l-liberta' tfisser ukoll li l-istat jimxi fuq il-prinċipju tal-parteċipazzjoni tal-ħafna fit-tfassil tal-politika tiegħu.  

Fuq kollox nemmen fil-liberta' tal-istituzzjonjiet ta' pajjizna ħalli jiddefendu dejjem id-drittijiet taċ-ċittadin mill-arroganza ta' min jaħseb li jista’ jikkmanda kollox kif irid hu. 

---

Nemmen

• li l-mezzi ta’ l-informatika huma għodda mill-aqwa biex noħolqu x-xogħol;
• f’investiment qawwi f’sistemi tal-informatika moderni u ta’ l-aqwa tekonoloġija biex ikollna vantagġfuq il-kompetituri tagħna;
• li dawn is-sistemi jintużaw  b’mod sħiħ fit-tixrid ta’ l-informazzjoni inkluż fuq l-operat tad-dipartimenti u l-entitajiet ta’ l-istat;
• li nagħmlu minn pajjiżna l-aqwa ċentru reġjonali tal-informatika anke billi nattiraw lejna investiment fir-riċerka u żvilupp  minn kumpaniji kbar;
• f’investiment qawwi fin-nies tagħna biex ikunu fuq quddiem nett fl-għerf ta’ sistemi moderni ta’ l-informatika.

---

Nemmen

• f’ekonomija b’saħħitha li tippermettilna li pajjiżna jkompli jikber u l-poplu tagħna jkollu kwalita’ ta’ ħajja aħjar;
• li l-Gvern għandu jinvesti l-ġid iġġenerat f’oqsma strateġiċi ħalli niżguraw li pajjiżna jibqa’ kompetittiv;
• li ekonomija b’sahhitha ma tfittix biss il-ħolqien tal-ġid imma ukoll it- tqassim tiegħu b’mod ġust;
• li l-Gvern għandu kemm jista’ jkun jinża mill-funzjoni operattiva tiegħu inkella jsib forom ta’ tisħib mal-privat ħalli jtejjeb l-effiċjenza. 
• li l-funzjoni tal-Gvern trid tibqa’ waħda biss fejn l-istat jiffaċilita t-tkabbir tal-ekonomija u ta’ regolatur fuq l-operaturi privati. 

Nemmen fuq kollox li l-ekonomija trid tassigura li l-iżvilupp ta’ pajjiżna jkun marbut b’mod sħiħ ma’ l-iżvilupp soċjali u ambjentali ta’ pajjiżna.

---

Nemmen

• li t-turiżmu huwa pilastru ferm importanti fl-ekonomija tagħna u jipprovdi mezz t’għixien lill-eluf ta’ Maltin u Għawdxin. 
• li rridu ninvestu ħafna aktar fl-infrastruttura tal-wirt storiku ta’ pajjiżna ħalli pajjiżna jsir  aktar destinazzjoni unika;
• li s-servizzi li niprovdu jridu jakkomodaw lit-turist u mhux bil-kontra;
• li istituzzjoni bħall- ITS irid jibqa’ jkollha l-mezzi neċessarji ħalli tattira l-aqwa staff u tissieħeb f’partnership strateġiku ma’ istituzzjonjiet barranin simili;
• li l-Gvern jfassal programmi ta’ titjib fl-infrastruttura ġenerali tal-lokalitajiet li l-aktar jilqgħu fihom turisti;
• li lit-turist inżidulu l-opportunita’ li jiekol l-ikel tipiku Malti u dak Meditterranju;
• li għandna ningħaqdu mal-pajjizi ġirien tagħna biex noffru pakketti flimkien.

---